LOHN UND STRAFE
A kloan's, frumm's Madarl hod a Zwüllingsbriadarl g'hobt, dös oba voll Unfiarm woar.
Ofd'n hod d' Muada amal an'n iad'n a Loabl Brot, a Schtikl an'n Kas und drei funklnoglnaichi Kraiza geb'n und g'sogt, sö soll'n mitsamm in'n Wald auffigeh'n und Garba broka. Dös hau s' a don, und wia s' sau in'n Wald eini kemma, is ofd'n oans dohin gonga, 's ondari duarthin, um Garba z'suacha, und so hon s' af d'letzt, wia s' ollawal diafr in's Gschtaudarad sau g'rod'n, oananda goar aus'n Augnan valoarn. Af amol is 'n Madarl an eisgrab's Muadarl begeg'nd, und dös woar unsa liabi Frau.
"Ai, Kloani, wo gehst hin?"
"Noun, hold Garba broka."
"Und wos host denn do?"
"An'n Loab Brot, a Schtikl an Kas und drei Kraiza."
"Schau! Wia-ri old bin und oarm! Wüllst mar nix davon schenka?"
"Ai frali wohl!" sogd ingeg'n da guadherzichi Froz und dald mit d'r old'n Frau 'n Loab Brot und 's Schtikl Kas und gibt da sölbich'n iba dös noh zween Kraiza.
Ofd'n hod si d' liabi Frau rechd driba gfraid und sogd: "Schau', walst mar hald wos geb'n host, so wüll i dar ah wos geb'n. Doda host a g'schekkads Schachdarl, muaßt as aba balei nöd z'voar afmocha, ols bis d' z' Haus kimmst, und ofd'n muaßt fain saibali a frisch z'wog'ns waiß's Duach iba'n Disch broad'n und 's Schachdarl draf schtöll'n, wonnst as afmocha wüllst."
Wia s' dös g'sogd hod g'hobt, hod si 's Madarl scheu fainla davoar bidankd und a Bukarl g'machd - und unsa liabi Frau is waida gonga.
In'n Hui! woar d' Kloani z' Haus, hod don, wia's is anpfohla woarn, und wia s' 'n Deckl in d' Hech hebd - ui jegas! ofd'n san af amal drei wundascheni Engarln außa gfludrazt mit an goldanan Kraushoar, kizblow'n Gugarln und schneebliaweiße Fligarln; dö hau iar an frisch'n Kranz von Rosnan, Fülling und Vagißmeinnöd af's Schedarl g'setzt und hon s' ibr a scheni Reg'nbog'nbruka grod in'n Himml aini gfiard.
's Briadarl hearngeg'n is in'n Wald gwe'n, und zu eam is a schtoanolda Daddl kemma, dear 'n Buam frog'n duad: "Wo-r-ar denn hingang, wos ar doda bai eam hed und ob er eam nöd ebba ebbas schenka wollad, wal ar hold goar so old war und oarm?"
Da kloani Kruz oba hod g'andwurd'd: "Na, bilai! I gib dar nix, brauch' ollas fir mi sölba."
Ofd'n is da Daddl fuchti woarn und sogd: "Schau', i bin dain Heargod, i brauch' dain G'schank nöd, du oba glaiwölst 's mainichi." Nid den schenkt ar eam ah so a Schachdarl und d'r unmaniarliche Buar is glei, ohne z' donka, z' Haus g'rennd und mocht fiarwitzi 'n Deckl af. - Au wewarl! ofd'n schtaigt an obschailicha Krambas aussa, dear hod an aing'wassadi Ruad'n in da Hond, nimmd 'n Buam bai'n Hefarl und klopft eam's so aus, daß ar jamali g'schrian hod.
Wal ar si's obr af imma g'miarkt hod und noch da Hand maniarli und frumm is woar'n, und wal a sain Schwösta flaißi bai'n liab'n Himmelvoda fiar eam bet't hod, is ar amol in da Fruah gach munta woar'n, und wiar-r-a si hold umschaut, siacht ar sain Schwöstarl und is midd'n in'n goldanan Himmlssol g'schtand'n.
Quelle: Die schönsten Märchen aus Österreich,
o. A., o. J.,