Dê Wind un dê Bûr.
Då wås mål ês ên Bûr, den sîn Hûs was sêr grôt un schoen. Dê Wind öwer rêt em alle Dachschtên run. Då måk hê sich up un jüng hen nå em un bünn sîn Esel an bî''n Bôm, wô dê Wind wônt. As dê Bûr rup kaem, då was dê Wind selwst nonnich dår, un hê verteilt dat sîn Frû. Un dûrt går nich lang, då kümmt hê, un sê verdeckt em rasch mit ne Tûnn. As hê öwer kaem, sae hê glik: "Dat ruekt hîr nå Menschenflêsch." Dê Frû sächt öwer: "Då is noch ken Mensch bî mî west", un hê lêt sich berêden un schwêch schtill.
Nich lang, då jüng de Wind
werrer wech, un sîn Frû lêt den Bûr rût
un sae tô em, sê wull alles besorgen. As hê unnen is,
då was sîn Esel all lôs von Wind, un hê moekt,
dat hê nå Hûs kümmt.
As dê Wind werrer troech kaem, sächt em sîn Frû,
wat hê all anrieht harr. Dat dae em dunn uk lîd, un hê
gaef den Bûr düchdich Jeld un lêt em unjeschôren.
Dê Bûr was nû rîk un em kaem kên Schåden
an.
Mündlich aus Ückermünde, Kr. Ückermünde.
Volkssagen aus Pommern und Rügen, Ulrich Jahn, Berlin 1889, Nr. 54